Nagatunog ang espekulasyon nga mahimo mag-atubangay liwat si Manny Pacquiao kag si Floyd Mayweather Jr. kun magdaog ang Pinoy boxing icon sa title fight sini sa Domingo sang aga (PST).
Nag-umpisa ini sa reports nga magalantaw ang 48-anyos nga retired undefeated boxing champion sa away ni Pacquiao batok kay Mario Barrios sa MGM Grand Arena sa Las Vegas, Nevada para sa World Boxing Council welterweight crown.
Duha sa mga boksidor nga magahampang sa undercard sa Domingo ang napaidalom sa Mayweather Promotions.
Nag-post man si anay Los Angeles Times reporter Lance Pugmire sang posibilidad sang ikaduha nga Pacquiao-Mayweather slugfest.
“Conversations are already happening … If Manny wins, this (rematch) could be worth billions,” I was told,” suno kay Pugmire sa X.
Matandaan nga ang American boxer ang nagdaog sa ila nga welterweight unification bout paagi sa unanimous decision nga naglab-ot sa record nga 4.6 million pay-per-view buys kag masobra sa $410 million nga revenue.
Kasunod sadto, duha ka beses pa nga naghampang si Mayweather lakip na ang blockbuster game batok kay MMA superstar Conor McGregor antes siya nag-retiro sa boksing nga may undefeated record nga 50-0 lakip na ang 27 knockouts.
2021 naman sang nag-retiro ang nagaisahanon nga eight-division world champion nga bugal sang Pilipinas nga may 62-8- record lakip na ang 39 KOs.
