Padayon nga ginabantayan sang Antique Provincial Disaster Risk Reduction and Management Office (DRRMO) ang kahimtangan sang panahon sa probinsya bangud sang padayon nga pagbubo sang mamunog nga ulan, ilabi na sa northern portion sang Antique.
Suno kay Mr. Michael Tolentino, sang LDRRMO IV, iya ginpahayag nga may 13 ka mga kabanwahanan ang apektado sang Habagat, nga nagalab-ot sa 82 ka mga kabaranggayan.
Dugang pa niya, 3,243 na ka mga pamilya ukon 8,421 ka mga indibidwal ang ginpa-evacuate bangud sang peligro nga dala sang padayon nga pag-ulan kag pagbaha.
Gin-athag man niya nga naka-“orange status” na ang probinsya sang Antique halin sa “red alert” kahapon nga adlaw, Hulyo 17.
Ini nagakahulugan nga naganubo na ang lebel sang peligro, apang padayon ang pag-monitor kag preparasyon sa anuman nga posibilidad nga kalamidad.
Sa subong, nagahupa na ang mabaskog nga ulan kag hangin sa probinsya. Apang, wala pa gihapon nagakampante ang mga otoridad.
Padayon ang ginahimo nga mga rescue kag clearing operations sa mga karsada, sa koordinasyon sang mga Municipal Disaster Risk Reduction and Management Offices (MDRRMOs) kag mga barangay officials.
Ginahingyo sang LDRRMO ang publiko nga magpabilin alerto, kag magkuha sang impormasyon halin sa mga lehitimo nga sources kasubong sang lokal nga pamunuan kag radyo.
