Gin-anunsyo sang Philippine Basketball Association (PBA) nga dal-on sini ang pila sa mga hampang sang liga sa Bahrain sa Disyembre bilang parte sang mga aktibidad sa 50th season.
Ginkumpirma ini nanday League commissioner Willie Marcial kag Bahrain Basketball Association president Alaa Mudara.
Pahayag ni Marcial, para ini sa PBA fans nga maka-enjoy sa paglantaw kag mga Pinoy nga indi makapuli sa Pilipinas agud maglantaw sang basketball sang paborito nila nga players sa liga.
Suno sa iya, tatlo ka teams ang magalupad pa-Bahrain sa Disyembre 15-17 kun sa diin isa ka team ang magahampang sang back-to-back games. Ini nga mga hampang magadungan man sa National Day celebration sang Bahrain sa Disyembre 16.
“We’ll have the same format like in Dubai (2019) with three teams, back-to-back games yung isa,” pahayag sini kadungan sang short presser sa halftime sang Game 5 sang All-Filipino conference finals sa tunga sang San Miguel kag TNT sa Smart Araneta Coliseum kagab-i, Hulyo 23.
Wala na gindetalye sang opisyal kun ano nga teams ang pakadtuon sa Middle East. Kinahanglan pa maghimo ang liga sang official schedule para sa season-opener nga Philippine Cup.#
