Isa ka North Korean nga lalaki ang madinalag-on nga nakapalagyo pakadto sa South Korea paagi sa paglangoy sa dagat gamit lang ang plastic foam nga ginputos niya sa iya lawas.
Nakit-an ang lalaki sang gab-i sang Hulyo 30 matapos ang kapin 10 ka oras nga paglangoy sa nga nakatundan nga baybayon sang Korean Peninsula.
Suno sa mga opisyal sang South Korea, nag-alsa sang iya kamot ang lalaki kag nagsinggit sang iya tuyo nga mag-surrender antes siya ginsalbar sang militar.
Nahibaluan nga tumalagsahon nalang ang pagpalagyo sang madinalag-on halin sa North Korea pakadto sa South sa nagligad nga mga tuig.
Ini bangud sa pagdugang sang seguridad kag pagtukod sang mga dugang nga barikada nga ginpatukod ni Pyongyang leader Kim Jong-Un sa palibot sang border, nga may mando nga pangtiruhon ang bisan sin-o nga magpanikasog nga magpalagyo.
Sang una, madamo nga North Korean ang nagapalagyo paagi sa China, pero bangud sa mas istrikto nga seguridad, kadam-an subong nagapangita sang mas delikado nga ruta, pareho sang pagtabok sa Demilitarized Zone ukon paglangoy sa dagat.
Sang nagligad nga tuig, 236 lang ka North Korean ang nakaabot sa South Korea nga isa ka daku nga pagnubo ipaanggid sa sang una nga masobra 1,000 ka mga persona sa kada tuig.
Suno sa United Nations, madata ang paglapas sa tawhanon nga kinamatarong sa Pyongyang, lakip na ang public execution, torture, kag forced labor. Ginapahayag man nga halos tunga man sang ila populasyon ang naga-antos sa gutom.#
