Nagpangabay si Punong Barangay Elfren Cenayo sang Brgy. Don Esteban, Lapuz, Iloilo City nga pamatian ni Presidente Ferdinand “Bongbong” Marcos Jr. ang panawagan sang komunidad nga unahon ang rehabilitasyon sang Budburan Creek, nga makabenepisyo sa mga residente sang Lapaz kag Lapuz.
Sa interview sang Bombo Radyo kay PB Cenayo, ginpahayag niya nga may mga dokumento na siya nga ginpadala sa komitiba, lakip ang mga litrato kag sulat nga nagapakita sang sitwasyon sang lugar.
Suno sa iya, nagalaum siya nga pamatian sang mga otoridad ang hibubun-ot sang pumuluyo, ilabi na nga sa tagsa ka gamay nga ulan, naga-antos na sila sang baha kag nagakaangkon sang ‘lan-ag’.
Ginkwestyon man ni Cenayo ang ginatuon sang gobyerno sa esplanade projects, nga ginakabig niya nga beautification lang kag indi epektibo batuk sa baha.
“Ang tuonan ang flood-control, indi ang esplanade. Indi ta man na matawag nga ‘flood-control’ ang esplanade nga na, beautification na ya,” pahayag pa ni Cenayo.
Ginpanawagan niya nga unahon ang tinuod nga solusyon sa baha, paagi sa rehabilitasyon sang Budburan Creek, nga dugay na ginareklamo sang mga residente sang Lapaz kag Lapuz.
