Arestado ang magpamilya sa ginpatigayon sang Iloilo City Drug Enforcement unit nga buybust operation sa Brgy. South Baluarte, Iloilo City.
Ang mga nadakpan amo sanday alyas “Rodman”, 26-anyos nga amo ang main target; alyas “Ampay”, 53-anyos, iloy ni Rodman; kag alyas “Lyn”, 49-anyos, tiya sang main subject.
Lunsay mga residente sang amo nga barangay ang mga arestado.
Sa interview sang Bombo Radyo kay Police Captain Roque Gimeno III, officer in charge sang Iloilo City Drug Enforcement Unit, iya ginpahayag nga isa ka sachet sang ginasuspetsahan nga shabu ang nabakal sa operasyon kag 14 pa gid ka mga sachet ang na-recover sa mga arestado.
Sa kabug-usan, may yara sang 15 ka sachet ang nakumpiskar nga may kabug-aton nga ginabulubanta masobra 150 gramos kag may standard drug price nga ₱1,020,000.00.
Suno kay PCapt. Gimeno, nga nakabaton sila sang reklamo sa mga pumuluyo sang nasambit nga lugar nga magpamilya ang nagabaligya sang droga sa ila barangay.
Gilayon man ini ginmonitor sang mga otoridad nga naglab-ot tatlo ka semana antes nadakpan ang mga subject.
Dugang pa ni PCapt. Gimeno nga ginakabig nga family business sang mag-pamilya ang pagbaligya sang mga illegal nga droga.
Sa subong, yara na sa kustodiya sang ICPS 4 ang mga nadakpan nga arestado kag posible magapangatubang sang kaso nga pagpalapas sa Republic Act 9165 ukon Comprehensive Dangerous Drugs Act of 2002.
