Nagpakig-angot kay Department of Justice (DOJ) Secretary Jesus Crispin Remulla ang isa ka abogado nga naga-represent sang isa sa Top 15 contractors sang government-funded nga flood control projects.
Suno kay Remulla, isa ini ka “potential whistleblower”.
Pahayag sang tiglikom, naghatag ang abogado sang ideya kun ano ang nagakatabo sa isa sa “ghost projects” sa Central Luzon.
“I have been approached by a lawyer representing a potential whistleblower and they have told me— he’s given me an idea of what happened in one of the projects in Central Luzon, in projects worth P5 billion. Ghost projects,” suno kay Remulla.
Ginkumpirma sini nga naghalin ang abogado sa isa sa 15 ka mga kontraktor nga ginlawag ni President Ferdinand Marcos, Jr. nga amo ang involved sa maanomaliya nga flood control projects.
Suno pa sa Justice secretary, ginpahibalo man siya sang abogado nga mahimo sini ibuyagyag sa gobyerno ang nagakatabo sa modus operandi, ang distribusyon sang kuwarta, ang kontrata, kag ang mga iregularidad.
“Hindi pa tumutuloy. Nagbigay lang sa akin ng idea na ‘yung contractor ang kinuha 40%, ang DPWH ganto, na ma-encash ‘yung pera… kahit na DPWH lang ang payable sa contractor. Basta’t marami nang modus na sinabi sa akin nu’ng Sabado,” pahayag ni Remulla.
Dugang sini, nagahulat pa siya sang ebidensya halin sa abogado.
Nagpanawagan man ini sa iban nga posible nga whistleblowers nga magpalapit sa DOJ, kag kun kinahanglan, mahimo man sila mabutang sa Witness Protection Program sang ahensya.#
