Ginapabaskug sang Department of Agriculture sa Western Visayas ang kampanya para mapaayo ang produksyon sang mais sa rehiyon, paagi sa pagpasanyog sang mekanisasyon kag paggamit sang mga teknolohiya nga base sa siyensya.
Sa interview sang Bombo Radyo kay Mr. Renan Palomo, Regional Focal Person sang Corn and Cassava Program sang Department of Agriculture-Western Visayas, ginpahayag niya nga may yara sang kabug-osan nga 47,111 ka ektarya nga corn area sa rehiyon kag 42,000 ka ektarya lang ginatanum sang yellow corn nga ginagamit bilang feeds para sa mga baboy kag manok.
Ginpunto ni Palomo nga ang average yield subong sang yellow corn amo ang 4.66 metric tons kada ektarya, kag ang target sang ahensya amo nga maabot ang 6 metric tons para mas mapaayo ang sufficiency level sang mais sa Western Visayas.
Ginpahayag man niya nga sa tuig 2024, ginatarget sang ahensya nga maabot ang projected sufficiency level nga 57.3%.
Gindugang pa ni Palomo nga isa sa mga tinutuyo sang ahensya amo ang pagpasangkad sang mechanization program kag pagduso sang paggamit sang mga teknolohiya nga ginbase sa siyensya para mabuligan ang mga mangunguma nga mangin mas epektibo kag mas produktibo.
Gin-anunsyo man niya nga sa palaabuton nga Setyembre 22-26, pagahiwaton ang 18th Philippine National Corn Congress para sa Visayas cluster kag ini nga aktibidad isa ka national event nga pagatambongan sang mga resource persons halin sa nagkalain-lain nga bahin sang Pilipinas.
Pagatalakayon diri ang mga direksyon kag estratehiya sang corn industry sa bilog nga pungsod, lakip na ang livestock industry, marketing opportunities, potential market, kag ang paggamit sang bio fertilizers bilang kabahin sang padayon nga pagbangon halin sa epekto sang African Swine Fever (ASF).
