Ginhatagan sang pagpasidungog ang tatlo ka mga Ilonggo nga high-ranking officers sang Armed Forces of the Philippines (AFP) kadungan sang flag-raising ceremony sang Iloilo Provincial Government subong nga aga, Oktubre 13.
Lakip diri si Lt. Gen. Antonio G. Nafarrete, 67th Commanding General sang Philippine Army, tumandok sang Calinog, Iloilo kag alumnus sang West Visayas State University (WVSU).
Ginkilala man si Lt. Gen. Luis Rex Bergante, 14th Commander sang AFP Eastern Mindanao Command, nga tumandok sang Jaro, Iloilo City, kag graduate sang Central Philippine University (CPU).
Yara man sa amo nga seremonya si Lt. Gen. Jimmy Larida, 51st Vice Chief of Staff sang AFP, tumandok sang Dueñas kag alumnus sang CPU.
Kada awardee ang ginhatagan sang plaque of recognition kag kopya sang Resolution of Commendation nga ginpasar sang Sangguniang Panlalawigan bilang pagkilala sa ila nga dedikasyon sa trabaho kag serbisyo sa mga pumuluyo nga Pilipino.
Nagpanguna sa paghatag sang award si Governor Arthur Defensor, Jr. kag ang iban pa nga opisyal sang probinsya.
Nagtambong man sa seremonya ang pila ka tiglawas nagikan sa Philippine National Police (PNP) lakip sanday PBGen. Josefino Ligan, regional director sang Police Regional Office (PRO) 6, kag PCol. Bayani Razalan, director sang Iloilo Police Provincial Office (IPPO).
(via Balita Halin sa Kapitolyo)
