Nakabiya na sa Pilipinas sanday President Ferdinand “Bongbong” Marcos Jr. kag First Lady Liza Marcos agud magtambong sa 47th ASEAN Summit and Related Summits sa Malaysia.
Naka-schedule ini sa October 26-28.
Antes naghalin sa Villamor Air Base sa Pasay City, naghatag anay si Marcos sang statement. Ginbilin sini bilang caretakers sang gobyerno sanday Executive Secretary Lucas Bersamin, Education Secretary Sonny Angara, kag Agrarian Reform Secretary Conrado Estrella III.
Una na nga ginpahayag sang Department of Foreign Affairs (DFA) nga iduso ni Marcos ang mga interes sang Pilipinas kadungan sang mga aktibidad kun sa diin nalakip ang 14 leaders-level meetings kag tatlo ka signing ceremonies.
Sa amo nga byahe, iya pabakuron ang interes sang Pilipinas paagi sa pagpasanyog sang kalinong sa rehiyon, pagtib-ong sang economic cooperation, kag pagpadalom sang relasyon sa mga dialogue partners.
Ginalauman man nga maistoryahan ang iban pa nga importante nga mga isyu kaangay sang sitwasyon sa Myanmar, mga pagpanghangkat sa ekonomiya, kag iban pa nga geopolitical developments.
Sa sidelines sang summit, may pila ka bilateral meetings ang Chief Executive upod sa iban nga mga lider agud mas mapabakud pa ang diplomatiko nga relasyon kag mapangitaan sang bag-o nga mga lugar sang kooperasyon.
Magatapos ang 47th ASEAN Summit paagi sa pormal nga pag-turn-over sang Malaysia sang ASEAN Chairship sa Pilipinas.
