Ginpanginwala sang Philippine Navy nga yara sa ila kustodiya si retired Marine Sgt. Orly Regala Guteza.
Si Guteza amo ang gindala ni Senator Rodante Marcoleta agud magserbe bilang testigo sa Senate Blue Ribbon Committee investigation may kaangtanan sa gin-alegar nga maanomaliya nga flood control projects sang gobyerno.
Suno kay Navy spokesperson Capt. Marissa Martinez, madugay na nga retirado si Guteza sa Philippine Marine Corps halin pa sang Hunyo 30, 2020, kag bangud sini, wala na siya sang koneksyon sa Philippine Navy.
“As a retired serviceman, he no longer falls under the administrative authority of the PN. Any engagements or interactions he may have at present are undertaken in his personal capacity,” pahayag sini.
“It must be also made clear that Mr. Orly Regala Guteza is not under the protection of the PMC, which has no involvement in his personal affairs,” dugang ni Martinez.
Ginhimo sang opisyal ang pahayag matapos ang alegasyon ni anay Quezon City Rep. Mike Defensor nga yara sa idalum sang proteksyon sang Philippine Marines si Guteza.
Madumduman nga gin-implicate ni Guteza si anay House Speaker Martin Romualdez sa flood control corruption.
Gintanyagan pa siya sang Senado sang proteksyon apang nagpanindugan ini nga masarangan niya protektahan ang iya kaugalingon.
Nagtuhaw ang mga pagduhaduha sa iya kredibilidad sang nagsiling ang isa ka abogado nga wala niya ginpirmahan ang affidavit nga ginbasa ni Guteza sa Senado.
Pagkatapos, indi na makontak si Guteza.
Nauna na nga ginpahayag ni Senate President Pro Tempore Ping Lacson nga sa iya pagbalik bilang chairman sang Senate Blue Ribbon committee sa Nobyembre, paatubangon sini liwat si Guteza sa Senado agud maathag ang iya ginsumpaan nga mga pahayag.
