Ginpasaka na sa Wind Signal No. 4 ang probinsya sang Guimaras kag ang pito ka iban pa nga areas sa Visayas kag sa Mindanao bangud sa pagbaskog ni Bagyo Tino.
Signal no. 4 man sa extreme southeastern portion sang Eastern Samar; western kag southern portion sang Leyte; Southern Leyte; Northern portion sang Cebu lakip na ang Camotes Islands; kag Northeastern portion sang Bohol sa Visayas; amo man sa Dinagat Islands, Siargao, kag Bucas Grande Islands sa Mindanao.
Signal No. 3 naman sa Iloilo, southern portion sang Capiz (Tapaz, Mambusao, Jamindan, Dumalag, Dumarao, Cuartero, Dao, Panitan, Pontevedra, Sigma, President Roxas, Ma-Ayon, Pilar), kag sa central kag southern portions sang Antique ( Tobias Fornier, Anini-Y, Hamtic, San Jose, Sibalom, Belison, Patnongon, San Remigio, Valderrama, Bugasong, Tibiao, Laua-An, Barbaza).
Sa pihak nga bahin, Signal no. 2 sa nabilin nga bahin sang Capiz, Aklan, kag nabilin nga bahin sang Antique lakip na ang Caluya Islands.
Sa latest advisory sang PAGASA, may HEAVY RAINFALL RED WARNING sa bug-os nga Western Visayas.
Ulihi nga nakit-an ang sentro sang bagyo sa kadagatan nga sakop sang Loreto, Dinagat Islands dala ang kabaskugon sang hangin nga 150 km/h malapit sa sentro kag pagmadlos nga tubtub sa 205 km/h.
Nagahulag ini sa direksyon nga pa-nakatundan sa kadasigon nga 30 km/h.
Pagkatapos maglabay sa Homonhon Island kag Dinagat Islands, maga-landfall ini sa Leyte ukon sa Southern Leyte subong nga tungang gab-i ukon karon sa kaagahon.
Sunod ini nga magatabok sa Visayas kag sa northern Palawan halin buwas tubtub sa Myerkules sang aga. Posible nga magguwa ini sa Philippine Area of Responsibility (PAR) sa Myerkules sang gab-i ukon sa Huwebes sang aga.#
