Nagpabutyag sang pagkadismaya ang General Services Office (GSO) bangud sa paglinapta sang basura sa nagkalain-lain nga dalanon sang siyudad kasunod sang mga kahiwatan sa Dinagyang.
Base sa assessment sang GSO, nagbalandra ang mga nabilin nga basura sa mga lugar nga ginhiwatan sang event ilabi na pagkatapos sang Opening Salvo sang Sabado.
Sa interview sang Bombo Radyo kay Engr. Neil Ravena head sang GSO, ginalauman nila nga maganubo na ang basura bangud madamo na sang ginpangbutang nga mga waste bins sa syudad.
Suno kay Ravena masobra 60 ka basurahan ang ginpahamtang sang city government apang madamo sa gihapon sang truck nga basura ng nakuha pagkatapos sang mga ginpatigayon nga events.
Ginpahayg man ni Ravena nga wala na ginaplano nga dugangan pa ang basurahan bangud, suno sa GSO, indi kakulangan sang basurahan ang problema kundi kakulangan sang disiplina sang mga tawo ang rason nga nagadamo sa gihapon ang basura sa dalanon.
Dugang pa niya, may yara sang kasugtanan ang city government kag ang mga street vendors nga magbutang sang kaugalingon nila nga basurahan sa ila pwesto.
Nagapanawagan ang GSO sang kooperasyon sang tanan, ilabi na sang mga nagatan-aw sa mga kahiwatan sa syudad kag mangin responsable sa ila nga basura.
Nagalaum ang GSO nga sa masunod nga mga event sa Dinagyang, mangin mas matinlo ang syudad paagi sa husto nga pagpatuman sang disiplina kag responsibilidad sang tagsa ka pumuluyo.
