Naka-experiensya sang pagkadelay ang mga kapulisan sang pagserbe sang warrant of arrest batok sa negosyante nga si Charlie ”Atong” Ang sa iya balay sa Pasig City.
Nagtaas naman ang tensyon sang mga personnel sang Criminal Investigation and Detection Group (CIDG) matapos wala gilayon ginpahanugutan nga makasulod sa balay sini apisar napresentar na ang warrant of arrest.
Nahibaluan nga nagpaguwa sang warrant of arrest ang regional trial court sa Sta. Cruz, Laguna batok kay Ang kag sa 17 pa ka iban nga naangot sa kaso nga kidnapping with homicide kahapon nga adlaw, Enero 13.
Ang kaso nga ini indi pwede nga mapyansahan sa idalom sang layi sang Pilipinas.
Samtang, nagbutang naman sang hagdan ang mga awtoridad sa atubangan sang gate sang balay ni Ang apang nagapabilin ini sa gihapon nga nakasara ang gate sini.
Nag-abot naman ang abogado ni Ang kag nagpangabay sa mga awtoridad nga siya anay ang magasulod sa balay sini antes sila magsulod.
Ginpangayo naman sang abogado ang mga pangalan sang mga awtoridad nga nagsulod lakip na diri ang apat ka mga pulis kag isa ka opisyal sang barangay.
Matapos ang malapit isa ka oras nga hulat kag pagbantay wala nila makit-an si Ang.
Sa pihak nga bahin ginbaton naman sang abogado ni Ang ang warrant of arrest batok sa negosyante.
Suno pa sa mga awtoridad nga kun indi man nila makit-an si Ang ila man tingwaan nga lantawon kun nagwa ini sa pungsod.
