Ginpasakaan sang kaso nga libel ni Batangas Rep. Leandro Leviste si Palace Press Officer Atty. Claire Castro bangud sa nangin komento sini tuhoy sa solar firm sang mamalidha.
Nag-file si Leviste sang 22-page libel complaint batok kay Castro sa Balayan Regional Trial Court sa Batangas, subong nga adlaw, Enero 16.
Suno kay Leviste, nagsuprir ini sang anxiety, indi ini makatulog sa gab-i, kag nadulaan sang gana sa pagkaon bangud sa ginbuy-an nga mga tinaga ni Castro batok sa iya.
Gin-alegar ni Leviste nga nagbuya si Castro sang defamatory remarks sang ginsiling sini nga ginbaligya sang mamalidha ang isa ka kompaniya nga may yara sang legislative franchise.
P110 million in damages kag P1 million in legal fees ang ginasukot ni Leviste kay Castro.
Sa iya complaint, gin-athag ni Leviste nga ang social enterprise nga Solar Para Sa Bayan Corp. (SPBC), nga nagbaton sang 25-year franchise agud magtukod kag mag-operate sang microgrids sa bilog nga pungsod sang 2019, ang wala ginbaligya kag lain nga firm ang ginbaligya sa Meralco PowerGen Corp (MGEN).
Ang subsidiary sang Solar Philippines Power Project Holdings Inc. (SPPPHI) nga SP New Energy Corp. (SPNEC), amo ang ginbaligya sini ang kalabanan sang iya shares sa MGEN.
Sang October 2025, iya gin-divest ang malapit P13.8 billion nga shares sa isa ka deal sa subsidiary sang Meralco.
Partikular nga ginreklamo ni Leviste ang YouTube videos ni Castro kun sa diin ginkwestyon sini ang operasyon sang solar firms sang mamalidha.
Ginsiling ni Leviste nga ginahigkuan ni Castro ang iya reputasyon kag ginaguba ang iya kredibilidad.
Nagbalos naman si Castro paagi sa pagsiling nga ang civil libel complaint nagatuyo nga pahipuson siya sa pagkwestyon sang mga motibo sang mamalidha.
