Ibutang sang Iloilo City Police Office (ICPO) sa crowded areas ang mobile jails nga ginpahulam sang Bureau of Jail Management and Penology (BJMP) 6 para sa Dinagyang Festival 2026.
Sa interview sang Bombo Radyo kay PCol. Wilbert Parilla, officer in charge sang ICPO, iya ginpahayag nga sa magutok ukon madamo nga mga tawo posible magluntad ang mga gamo.
Gintumod sini ang City Proper kun sa diin madamo sang mga aktibidad ang ginahiwat kag amo man sa distrito sang Mandurriao ilabi na sa area sang mga balay ilimnan.
Pahayag pa niya, may yara sang personnel ang BJMP nga magabantay ukon maga-drive sang mga mobile jails apang ang mga kapulisan gid sang ICPO ang magabantay sa publiko kag magadakop sa mga nagasinabad.
Ginapahanumdom man sa publiko nga likawan nga maghimo sang ano man nga gamo agud indi mapreso sa mobile jails kag indi makatuga sang huol ukon halit sa iban.
Madumduman nga ginpahulam sang BJMP 6 sa ICPO ang apat ka mga mobile jails agud mangin temporaryo nga presuhan sang sin-o man nga magtuga sang gamo sa tunga sang mga aktibidad.
—with reports from Bombo Krylle Melliza
