Nagbukas ang Criminal Investigation and Detection Group ukon CIDG sang hotline agud magbaton sang tawag ukon impormasyon nga makatudlo sa negosyante nga si Atong Ang.
Kasunod ini sang P10 Million nga reward nga gintanyag sang Department of the Interior and Local Government (DILG) sa sin-o man nga makatudlo sa amo nga wanted person.
Ginpaguwa man ang wanted poster nga nagaunod sang pangalan kag laragway ni Ang.
Sa 18 ka mga persona nga gindagdagan sang arrest warrant sang korte kaangot sa kaso sang ginpang-kidnap kag ginpangpatay nga sabungeros, isahanon na lamang si Ang nga nagapabilin nga at large.
Samtang, nagpaandam naman si Acting Philippine National Police chief PLt. Gen. Jose Melencio Nartatez Jr. sa publiko batok sa nagapalapta sang sala nga impormasyon kaangot sa posible nga ginahamtangan ni Ang nga pwede makapatalang sa nagapadayon nga operasyon.
Ginpaandaman man sini ang security agency nga indi maghatag sang anuman nga bulig sa negosyante dala na diri ang mga bodyguard ukon security escort.
Ginapahayag nga ginkadtuan naman sang CIDG ang kilala nga propyedad ni Ang sa Pasig City, Mandaluyong, Laguna, kag Batangas apang wala nila makit-an ang presensya ni Ang sa amo nga mga lugar.
