Wala ginpahanugutan ang pagpasulod sang mga gadgets kag mga bayo sang anay senador nga si Ramon “Bong” Revilla Jr. sa Quezon City Jail–Male Dormitory ini suno sa Bureau of Jail Management and Penology (BJMP).
Suno sa ahensya propesyonal ang mga personnel sang BJMP kag wala sang mga ini gina-tolerate ang VIP treatment.
Nahibaluan nga sang Lunes, Enero 20 nagpagwa ang Sandiganbayan Third Division sang warrant of arrest kag gin-hold ang departure order batok kay Revilla kag sa anum pa ka mga indibidwal may kaangtanan sa ginapatihan nga P92.8 million nga ghost flood control project sa Pandi, Bulacan.
Nagsungka si Revilla sang Lunes sa gab-i sa PNP–Criminal Investigation and Detection Group sa Camp Crame kag ginsaylo sa jail facility sang Martes.
Kahapon nga adlaw ginbisita siya sang iya mga kabataan kag utod sa iya selda.
Si Revilla kag ang iya mga upod nga akusado nga sanday Brice Hernandez, Jaypee Mendoza, Arjay Domasig kag Juanito Mendoza ang yara sa nagkalain-lain nga selda samtang nagapadayon sang mandatory nga pito ka adlaw nga quarantine.
Pagkatapos sang pito ka adlaw nga quarantine, si Revilla kag ang apat pa ka iban ang makaupod na sa iban nga mga PDL sa ila selda.
Nahibaluan nga nakabayad na si Revilla sang piyansa para sa iya graft case, apang nagapabilin siya sa prisohan bangod sang malversation charges.
