Nakakuha sang impormasyon ni former Anakalusugan Partylist Rep. Mike Defensor nga natultulan ang kontrobersyal nga whistleblower nga si Orly Guteza.
Si Guteza nga anay staff ni resigned Ako Bicol Party-list Rep. Zaldy Co amo ang surprise witness sa Senate Blue Ribbon Committee nga nag-implicate kay former House Speaker Martin Romualdez sa flood control corruption scandal sadtong Septyembre 2025.
Ang nagdala sa iya sa Senado bilang testigo amo si Senator Rodante Marcoleta, apang nauna na nga ginpahayag sang senador nga ang nagpakilala sa ila sa isa kag isa amo si Defensor.
Sa interview naman sang Bombo Radyo kay Defensor, iya ginpahayag nga wala sila sang direkta nga komunikasyon, apang sa iya nga ulihi nga impormasyon, na-locate na si Guteza apang indi siya sigurado kun sa diin ini subong.
“Parang na-locate na siya, pero hindi ako sigurado kung he is still under the custody of the Marines or malaya na siya,” suno sa anay kongresista. “Ang maganda naman ay syempre buhay siya. Ako naman ay natutuwa para sa kaniyang pamilya,” pahayag pa ni Defensor.
Ginkumpirma man sini nga may common friend sila ni Guteza rason nga nangin kilala man niya ini kag gin-refer kay Marcoleta nga sang una amo ang chairman sang Senate Blue Ribbon Committee.
Matandaan nga matapos ang iya testimoniya sa Senado, nangindulaan na si Guteza.
May nagguwa nga reports nga yara ini sa kustodiya sang Philippine Marine Corps (PMC) bilang isa ka retired serviceman, apang ginpanginwala ini sang Philippine Navy.
Sa pag-resume sang hearing sang Senate Blue Ribbon panel sang Lunes, nagpaguwa si Senate President Pro Tempore Panfilo Lacson sang show cause order batok sa iya. Nagpaandam ini nga maga-isyu sila sang arrest warrant kun wala sang maayo nga paathag kun ngaa wala gihapon ini nagsipot sa hearing.
