Kaangay nga nabunutan sang tunok ang pamilya sang isa ka Ilonggo seafarer nga residente sang Brgy. Cabanbanan, Oton, Iloilo matapos mahibaluan nga nakaluwas sa naglugdang nga barko ang ila himata nga si Carl Louise Balontong.
Sa interview sang Bombo Radyo kay Evelyn Balontong, nanay sang survivor nga si Carl Louise, iya ginpahayag nga kaagahon na sang mga ini nahibal-an ang natabo sa iya anak.
Tuman naman ang ila kalipay sang ginpahibalo ang mga ini nga nakaluwas si Carl kag pasado alas 8:00 na sa aga sang nagtawag si Carl kag gindala na ini sa General Isabela Hospital para sa medical evaluation.
Si Carl Louise Balontong, isa ka BS Marine Engineering graduate sang Western Institute of Technology (WIT) nga nagapatigayon sang iya one-year apprenticeship sa Aleson Shipping Lines.
Sa pagsaysay sang nanay sang biktima, ginpahayag sini nga nagakatulog siya sa kadena sang barko sang hinali na lang mabugtawan ni Carl nga nagaginahod na kag nagasulod na ang tubig.
Suno sa iloy, wala ginpukaw si Carl sang iya mga upod kag natingala na lang siya nga may nagatulo na nga tubig sa iya tiilan.
Sa tuman nga kahadlok, gilayon niya ginkuha ang iya cellphone kag mga papeles, apang nahulog ini.
Wala na sini ginbalik ang mga papeles bangud sa kahadlok nga posible ini mapatay, gani nagdesisyon na lang siya nga maglumpat sa dagat bisan wala sang life jacket.
Samtang, sa separado naman nga interview kay Carl Louise Balontong, iya ginsaysay nga masobra apat ka oras nga naglugdang ang barko kag madugay pa sila nga ginkadtuan agud i-rescue.
Ginpahayag man ni Balontong nga may yara kuntani ini sang life vest apang ginhatag niya ini sa iya Chief Engineer bangud kabalo na ini nga maglangoy kag mas kinahanglan ini sang ila Chief engineer.
Apang sa masubo nga palad wala makaluwas ang nasambit nga Chief Engineer.
Sa karon, yara na si Balontong sa opisina sang Aleson Shipping Lines, apang indi pa siya makalakat sang husto bangud sang iya mga pilas.
