Personal nga nag-atubang si anay House Appropriations Committee chairperson Zaldy Co sa isa ka notary public sa Stockholm, Sweden sang Enero 15.
Base ini sa apostile ukon certificate nga nagapamatuod sa ginhalinan sang public documents nga ginpasa sang iya nga abogado sa petisyon batok kay Ombudsman Jesus Crispin Remulla nga gin-file sang Enero 25.
Makita sa petisyon ang personal nga pagpirma ni Co sa banwa sang Nacka sa Stockholm, Sweden.
Kabaliskaran ini sa nauna nga pahayag ni Interior Secretary Jonvic Remulla nga si Co yara subong sa Lisbon, Portugal.
Nahibaluan nga si Co ang may ginapangatubang nga warrant of arrest sa Sandiganbayan bangod sa mga kaso sang malversation kag graft nga may kaangtanan sa ₱289-milyon nga flood control project sa Oriental Mindoro.
Sa iya petisyon, ginapangayo niya sa Korte Suprema nga magpagwa sang temporary restraining order kag dulaon ang resolusyon sang Ombudsman nga nagarekomendar sang mga kaso nga nagapahayag nga nalapas ang iya kinamatarong sa due process.
Suno sa kampo ni Co, wala ini nagpalagyo halin sa pungsod kag naglakat lang para sa medical leave apang indi na ini makabalik bangod sa seryoso nga pagpamahog sa iya seguridad.
