Nagluya kag nahimo na lamang nga low pressure area ukon LPA ang Bagyo Basyang samtang nagahulag ini sa direksyon nga pa-nakatundan sa kadagatan sang Sulu.
Sa alas singko sa kaagahon nga weather bulletin, ulihi nga nakit-an ang low pressurea area sa kalayuon nga 105 km/h Southeast sang Cuyo, Palawan.
Ginbawi naman sang Philippine Atmospheric, Geophysical and Astronomical Services Administration ang wind signal sa tanan nga mga lugar sa pungsod.
Apang suno pa sa ahensya, mabatyagan sa gihapon ang northeast monsoon ukon amihan kag magadala sang pagmadlos sang hangin ilabi na sa mga coastal areas sang Luzon, Western Visayas, Negros Island Region, kag Zamboanga del Norte subong nga adlaw.
Samtang mahinay ang hulag sang LPA kag bangud sa indi paborable nga kondisyon sang agyan sini, daku ang tsansa suno sa ahensya nga matunaw na ini samtang yara pa lamang sa kadagatan sang Sulu.
Antes nagluya ang bagyo, duha ka adlaw ini nga nagdala sang pag-ulan kag pagbaha sa Visayas kag Mindanao.
Lima ka beses man ini nga nag-landfall samtang yara sa sulod sang Philippine Area of Responsibility.
Natabo ini sa Bayabas, Surigao del Sur bilang isa ka tropical storm.
Bilang tropical depression, sunod ini nga nag-landfall sa Jagna, Bohol kahapon sang aga; sa
Dauis, Bohol kahapon sang hapon; kag sa Alcoy, Cebu kag Ayungon, Negros Oriental kagab-i.
Si Basyang amo ang ikaduha nga bagyo sa Pilipinas subong nga 2026 kasunod kay Bagyo Ada sang Enero.
Una na nga ginpahayag sang state weather bureau nga possible nga isa lang ka bagyo ang ma-eksperyensyahan sa bulan sang Pebrero.
Diri sa syudad sang Iloilo, nag-anunsyo naman si Mayor Raisa Treñas nga magabalik na ang klase para sa mga may Saturday Classes bangud nga nag-ayo naman ang kondisyon sang panahon.
