Ginkumpirma ni Coach Tim Cone nga indi man maghampang si Quentin Millora-Brown para sa Gilas Pilipinas para sa nagahilapit nga second window sang FIBA Basketball World Cup Asian qualifiers.
Wala sang ginhatag nga rason si Cone kun ngaa wala ang 25-anyos nga 6-foot-10 center, apang suno sa iya, ginpili ni Brown nga indi mag-upod sa Gilas sa hampang batok sa New Zealand kag sa Australia.
Matandaan nga malawig ang eligibility process nga gin-agyan sang Samahan ng Basketbol ng Pilipinas, kag pila ka bulan na ang nagligad, naaprubahan na ini nga makahampang kuntani bilang local player.
Ini nga former UP Fighting Maroons big man ang eligible naman bilang Asian import sa mga liga sa luwas sang pungsod, kag subong nagahampang siya para sa Chiba Jets sa Japan’s B.League.
Ginkumpirma man ni Cone nga ginpasulod sa training si Justine Baltazar nga amo ang posible magbulos sa national team.
Ini ang iya mangin una nga hampang sa Gilas halin sang 2021 FIBA Olympic Qualifying Tournament sa idalom anay ni head coach Tab Baldwin.
Magluwas kay Millora-Brown, kumpirmado nga indi man makahampang ang 7-foot-3 center nga si Kai Sotto para sa Gilas subong nga window bangud bag-o lang ini nag-ayo sa iya nga injury.
2-0 subong ang record sang Pilipinas kag nagapanguna sa Group A. Target sang team nga maka-secure sang ikaapat nga sunod-sunod nga appearance sa World Cup.#
