Gin-athag ni anay Vice President Leni Robredo kag subong Naga City Mayor nga indi pagdal-on ni President Ferdinand Marcos Jr. ang istorya-pulitika sa iya pagbisita subong nga adlaw sa Naga.
Ginalauman nga magakit-anay ang duha subong nga weekend para sa implementasyon sang Oplan Kontra Baha sa Naga City, Camarines Sur.
Nahibaluan nga nagtuhaw ang possible nga alyansa sa tunga ni Marcos kag Robredo halin sang gin-anunsyo ang ila nga meeting subong nga adlaw.
Suno naman kay Palace Press Officer Undersecretary Atty. Claire Castro, ang naka-schedule nga pagbisita ni Marcos sa Naga City subong nga adlaw sang Sabado, Pebrero 21, may kaangtanan sa mga tikang sang gobyerno batok sa pagbaha.
Suno pa kay Castro, indi pamulitika kag tuman pa kalayo ang eleksyon.
Nagpanawagan man ang Malacañang sa publiko nga untatan na ang magahod nga mga ekspekulasyon sa politika bangud naga-focus ang mga opisyal sa ila tagsa ka mga trabaho agud indi ang mga ini ma-distract sa tagsa nila ka mga obligasyon.
Gin-athag man ni Robredo nga malayo pa sa iya nga pinsar ang pulitika bangud nga nagatutok siya subong sa mga problema sang iya syudad.
Ini nga statement ni Robredo ang kasunod man sang mga espekulasyon nga siya ang makasumpong ni Vice President Sara Duterte sa presidential elections sa 2028.
Pahayag sini, tuman pa ka layo ang eleksyon, kag wala pa gani siya naka-isa ka tuig sa iya posisyon subong kag sa iya obligasyon sa iya nag syudad.
Sang Myerkules sang gindeklarar ni Duterte ang iya presidential bid.
