Impossible sa karun ang repatriation sang mga Pilipino nga naipit sa mainit nga tensyon sa Middle East suno kay President Ferdinand Marcos Jr.
Ini ang ginpahayag sang Presidente kadungan sang press briefing sa Malacañang, may kaangtanan sa sitwasyon sang mga Overseas Filipino Worker (OFW) sa Middle East.
Suno man sa record sang Department of Foreign Affairs (DFA), yara sa 1,460 ka mga Pilipino sa karun nga tion ang nagpanawagan nga makapauli sa Pilipinas, kun sa diin, may halos 586 ang naghingyo nga magpauli halin sa Dubai, 297 sa Israel, 270 sa Abu Dhabi, 231 sa Bahrain, 22 sa Jordan kag 10 sa Iran.
Ginhingyo man ni Marcos ang mga Pilipino nga temporaryo nga magsaylo sa mas hilway nga lugar agud masikyar ang ila seguridad.
Madumduman nga may narekord na ang Pilipinas nga casualty sa Israel, kun sa diin ginbawian sang kabuhi ang isa ka Pinay caregiver nga si Marry Anne Velasquez sang Pangasinan, nga nahibaluan man nga nagadala sang iya subang kun tani nga bata sang ini ang nadalahig sa isa ka missile attack sang Iran sa Israel.
Sa pihak naman nga bahin, nagpasiguro si Department of National Defense Sec. Gibo Teodoro, nga wala sang direkta nga pamahog sa seguridad sang Pilipinas ang nagakatabo nga tensyon sa Middle East.
Ini nga pahayag ni Secretary Teodoro ang kasunod man sang ginapahayag “wala sang basehan” nga mga huring-huring nga posible atakihun sang Iran ang Pilipinas bangud kaalyado sang pungsod ang Amerika.
Words by: Bombo Ian Gajete
