Gin-aprubahan na sang House of Representatives sa second reading ang hagna nga magahatag gahom kay President Ferdinand “Bongbong” Marcos Jr. nga temporaryo nga suspendihon ukon buhinan ang excise tax sa mga produktong petrolyo sa pungsod.
Ang House Bill No. 8418 nagatuyo nga magahatag sang konsiderasyon sa mga pumuluyo kun magsaka ang gastos sa transportasyon, pagkaon kag iban pa nga nagapanguna nga balaklon bangud sang pagtaas sang presyo sang gatong sa global market.
Suno sa mga mamalidha nga nagpatuman sang amo nga hagna, lakip na sanday Ilocos Norte Rep. Ferdinand Alexander “Sandro” Marcos kag House Speaker Faustino “Bojie” Dy III, ini magaserbe bilang madasig nga mekanismo sang gobyerno para maatubang ang tuman nga pagtaas sang presyo sang gatong.
Ang ini nga layi ginahatagan ang Presidente sang gahum agud mapatuman ang mga kondisyon kaangay sa kun maglab-ot ukon magsobra sa $80 kada bariles ang presyo sang Dubai crude oil sa sulod sang isa ka bulan, kag kun may ara sang state of national emergency ukon kalamidad nga nagadala sang indi ordinaryo nga pagsaka sang presyo sang petrolyo sa pungsod.
Samtang, ginapanindugan sang Kamara nga may limitasyon ang gahum sang Presidente:
Ang suspensyon ukon pagbuhin sang buwis pwede lang ipatuman asta anom ka bulan, kag indi maglapaw sa isa ka tuig, magluwas lang kun palawigon ukon tapuson sang Kongreso ini pinaagi sa joint resolution.
Kinahanglan man nga maghimo sang report ang Presidente sa Kongreso sa sulod sang 15 ka adlaw matapos ang kasuguan kag kinahanglan man sini nga maghatag sang monthly report sa epekto sini sa presyo sang gatong, inflation, kag kita sang gobyerno.
Ginpakigabto naman ni Marikina Rep. Miro Quimbo, chairman sang House Committee on Ways and Means, ang plano kag nagsiling nga may nagakaigo nga safeguard ini para maprotektahan ang mga konsumidor samtang ginapabilin nga mabaskog ang pondo sang gobyerno.
Tuyo sang plano nga masiguro nga may handa nga tikang ang gobyerno batok sa mga krisis sa global supply sang gatong nga mahimo makaapekto sang pagsaka sang presyo sang mga nagapanguna nga balaklon sa pungsod.
