Wala gin-aprubahan sang Senado ang pangabay ni Sen. Ronald “Bato” dela Rosa nga magamit ang iya pamilya sang Senate Mansion sa Baguio City.
Ini matapos nga nag-request ang senador nga gamiton sang iya pamilya ang Senate Mansion sa palaabuton nga Chief of Staff of the Armed Forces of the Philippines (CSAFP) Cup 2026 nga sport competition nga maga-umpisa halin Marso 26 tubtob Marso 29, 2026.
Marso 12 sang nagpadala si Dela Rosa sang sulat kay Senate President Vicente “Tito” Sotto III agud pasugtan ang iya pamilya nga magtinir sa Mansion samtang patigayunon ang aktibidad.
Apang ginpahayag ni Senate Secretary Mark Llandro Mendoza nga indi ini mahimo bangud gina-renovate subong ang mansion, kag may ara man sang polisa nga kinahanglan kaupod ang senador kun gamiton ini.
Nahibaluan nga wala na nakapakita ang senador sa publiko humalin Nobyembre 2025.
Wala naman sini gintambungan ang tanan nga aktibidad sa Senado apisar nga nagapadayon sa gihapon ang iya baton sang sweldo bilang senador sang pungsod.
Nag-umpisa nga nangin missing in action si Dela Rosa sang ginwaragwag ni Ombudsman Boying Remulla nga nag-gwa na ang gina-alegar warrant of arrest halin sa International Criminal Court (ICC) batok sa iya bangud sa iya nangin papel bilang PNP chief sang ginpatuman ang Duterte drug war.
