Magahulag ang Japan kag ang lima ka dalagku nga mga pungsod sa Europa agud nga makabulig nga makalabay sang hilway sa Strait of Hormuz ang mga barko nga may karga nga langis.
Ini ang kabahin sang kaundan sang joint statement nga gin-release sang United Kingdom, France, Germany, Italy, the Netherlands, kag Japan.
Sa amo nga pahayag, mabaskog nga ginkondenar sang anum ka mga pungsod ang mga pagpang-atake sang Iran sa mga commercial vessel sa Gulf kag sa civilian infrastructure lakip na sa mga oil kag gas installations.
Ginpakamalaot man sang amo nga mga pungsod ang “de facto closure” sang Strait of Hormuz.
Antes sini nga statement, gin-report sang Qatar nga daku nga halit ang ginsuprer sang Ras Laffan Industrial City bangud sang missile strikes sang Iran. Ang Ras Laffan amo ang naga-proseso sang ginabanta one-fifth sang liquefied natural gas sang kalibutan.
Gin-atake man ang main port sang Saudi Arabia sa Red Sea nga amo ang ginagamit agud nga ma-divert ang exports agud nga makalikaw sa Strait of Hormuz.
Suno sa anum ka mga pungsod, nagakahangawa sila sa nagalala nga sitwasyon.
Naghingyo sila nga untatan na sang Iran ang pagpamahog, pagtanum sang bomba, pag-atake gamit ang drones kag missiles, kag paghimo sang iban pa nga paagi agud nga ma-atake ang mga barko nga nagaagi sa Strait.
Pahayag pa sang anum ka pungsod, kun ano man ang ginahimo sang Iran, maapektuhan sini ang tanan nga parte sang kalibutan, lakip na ang pinakamahuyang ukon pigado nga mga pungsod.
Pahayag pa nila, handa sila nga maghimo sang mga tikang agud nga makaagi ang langis sa Strait of Hormuz, kag gina-abi-abi man nila kun may dugang nga mga pungsod nga magabulig sa pagpreparar kag pagplano.
Nagpromisa man sila sang dugang nga mga tikang agud nga mangin estable ang energy markets lakip na ang pag-trabaho sa mga pungsod nga naga-produce sang langis agud nga mas mapadamo pa ang suplay.
Wala sang dugang mga detalye nga ginbutang sa statement, apang ginakabig na ini nga daku nga development sa sulod sang tatlo ka semana nga gyera sa Middle East.
Wala man namensyonar sa amo nga statement ang Estados Unidos sang Amerika.
Antes sini, may panawagan si US President Donald Trump nga magbulig ang iban nga mga pungsod nga makaagi ang mga barko sa Strait of Hormuz, apang may mga pagpang-alang-alang pati ang mga kaalyado sang Estados Unidos nga mag-intra sa gyera.#
