Ginbalibaran sang Iran ang gintanyag nga 15-point peace plan sang Estados Unidos sa tunga sang nagapadayon nga tensyon sang duha ka pungsod.
Sa baylo, nag-isyu sang kaugalingon nga counterproposal ang Iran kadungan sang paglunsar sini sang dugang nga atake sa Israel kag Gulf Arab countries.
Duha ka officials halin sa Pakistan ang naglaragway sa 15-point U.S. proposal nga naga-address sa sanctions relief, rollback sa nuclear program sang Iran, kag limitasyon sa missiles kag reopening sang Strait of Hormuz.
Sa gin-isyu naman nga plano sang Iran, luyag sini nga mauntat ang pagpamatay sa ila mga officials, siguraduhon nga wala na sang iban nga giyera nga ilunsar batok sa ila kag ang pagtugot sa Iran nga gamiton ang ila soberanya sa Strait of Hormuz.
Nahibaluan nga ginpabutyag ni President Donald Trump nga gusto sang Tehran nga makaangkon sang kasugtanan.
Samtang, isa naman ka ministro halin sa Israel ang nagpahayag sang pagpangduha-duha sa amo nga tikang.
Suno sa ministro nga ang plano sang US “matahum lamang sa papel,” apang ginpunto sini nga dako ang posibilidad nga indi ini pagbatunon sang Iran.
Apisar sa nagalala nga tension, ginpahayag sang Iran nga may ara sila sang misyon sa United Nations kun sa diin mahimo gihapon makaagi ang mga non-hostile vessels sa Strait of Hormuz.
