Posible nga kaso nga murder ang ipasaka batok sa 19-anyos nga suspek nga nagsapote kag nagbuno-patay sa lalaki nga nasapwan sa ibabaw sang Pavilion sa Leganes Plaza kahapon, Abril 8.
Ini amo si alias Mark nga nadakpan kaina sang kaagahon sa Población sa amo man nga banwa.
Madumduman nga ang biktima amo si Jhomel Alejandro, 29, residente sang Kalibo, Aklan, apang naga-trabaho sa Iloilo City.
Sa interview sang Bombo Radyo kay Police Corporal Joefel Amihan, imbestigador sang Leganes Municipal Police Station, iya ginpahayag nga si alyas Mark ang ginatudlo nga nanguna sa pagpangamot sa nasambit nga krimen.
At large naman ang duha ka kaupdanan sini nga lunsay naga-edad sang 14-anyos.
Suno kay Amihan, indi pa subong mahibaluan kun ano nga penalidad ang posible ipasaka sa duha ka menor edad bangud ang Department of Social Welfare and Development (DSWD) ang maga-uyat sang kaso.
Nagapangayo ang kapulisan sang kooperasyon sang mga ginikanan sang duha nga involved agud makaatubang sila sa awtoridad kasunod sang krimen.
Madumduman nga base sa imbestigasyon sang mga kapulisan kag sa bulig sang duha ka mga testigo nga upod man sang mga suspek sang natabo ang krimen, pagpang-tripping ang nangin rason sang krimen.
Base sa mga testigo, ululupod sila nga lima nga nag-inum-inom sa nasambit nga plaza kun sa diin ginsaway sang biktima ang mga suspek bangud nga magahod ang mga ini kag nagakatulog siya sa ibabaw sang Pavilion.
Sang nagbalik sa ibabaw ang biktima, didto nagpahayag si alyas Mark sa iya kaupdan nga trippingan ang biktima.
Gin-alegar nga gintinguhaan pa sang duha ka witnesses nga punggan ini siya apang wala nagpati kag didto na natabo ang krimen mga pasado alas-tres sang kaagahon sang Abril 8.
Nahibaluan man sa imbestigasyon nga naga-trabaho bilang cashier ang biktima sa Jaro, Iloilo City, apang may natabo nga indi-paghangpanay sa amo sini rason nga nagpadulong ini sa banwa sang Leganes kag didto nagtulog sa ibabaw sang Pavilion sa sulod sang pila ka adlaw antes natabo ang krimen.#
Report and Interview: Bombo Krylle Melliza
