Ginalauman nga matapos subong nga tuig ang duha ka proyekto sa distrito sang Lapuz sa idalom sang Department of Public Works and Highways- Iloilo City District Engieering Office (DPWH-ICDEO).
Una amo ang 480 linear meter nga construction sang drainage structure nga mahalin sa corner sang Rizal Monument pakadto sa Jalandoni Elementary School.
Ini nagsugod kahapon nga adlaw, Abril 20 tubtob Mayo 24 para sa sequence 1, samtang ang sequence 2 naman sa Mayo 25 tubtob Hunyo 27.
Dugang pa diri ang para sa Sequence 3, magasugod ini sa Hunyo 28 tubtob Hunyo 30 nga may contract cost nga P27-Million.
Sakop sang proyekto ang barangay nga Rizal Lapuz Sur, Progreso, Libertad, Jalandoni Estate.
Sa interview sang Bombo Radyo kay Rizal Lapuz Sur Kagawad Kent Alconga, iya ginpahayag nga apisar indi pa lubos nga kumbinsido ang mga ini nga matapos ini sa target date, naga- plano naman ang mga ini nga magbutang sang technical working group para mag-monitor sang proyekto kada semana.
Samtang, ang ikaduha nga proyekto naman nga amo ang 980 linear meter nga construction sang flood mitigation structure (section 3) nga mahalin sa Jalandoni/Alalasan pakadto sa Aguinaldo/Divinagracia lusot sa La Paz Plaza ang nagsugod naman kahapon nga adlaw Abril 20 tubtob Hulyo 1 ang sequence 1.
Ang sequence 2 sini ang magasugod Hulyo 1 tubtob Setyembre 15, kag Setyembre 1 tubtob Oktubre 20 naman sa sequence 3 nga may contract cost nga P102-Million.
Sakop sang amo nga proyekto ang barangay Don Esteban kag Alalasan sa Lapuz, samtang sa maangot ini sa Aguinaldo, Mc Arthur, kag Divinagracia sa La Paz.
Ini man ang proyekto nga indi tayuyon nga naubra sang nagligad nga tuig bangud na suspend ang tanan nga mga kontrata sang mga Discaya.
Sa interview sang Bombo Radyo kay Punong Barangay Arnel Asturias, Association of Barangay Captains (ABC) President sa distrito sang Lapuz, iya ginpahayag ang dako nila nga pagpasalamat nga may ara na sang koordinasyon ang DPWH-ICDEO sa mga kapitan nga amo ang may direkta nga hurisdiksyon sa lugar nga patukuran sang mga proyekto.
Suno sa iya, ini man ang una nga bes nga may ara sang pormal nga eksplenasyon sang proyekto nga dako nga bulig agud mapahibalo sang maayo sa mga pumuluyo.
