Ginmandu sang Bureau of Internal Revenue (BIR) ang pagpatigayon sang tax audits kanday Vice President Sara Duterte, bana sini nga si Atty. Mans Carpio, kag sa siyam ka mga negosyo nga naangot sa ila.
Natabo ini inadlaw matapos nga ginpaiway sang House Justice Committee ang pagbukad sang kahon nga naga-unod sang tax records sang mag-asawa.
Gin-defer ang desisyon matapos nga nagasumpakilay ang opinyon sang mga kongresista kun malapas bala nila ang probisyon sa National Internal Revenue Code nga amo ang nagadumili sa pagpagwa sang confidential nga impormasyon nga wala sang consent ukon pahanugot sang taxpayer.
Sa statement sang BIR subong nga Martes, ginsiling sini nga nagmandu ini sa pag-isyu sang Letters of Authority (LOAs) para sa pagpatigayon sang audit.
Ini matapos natumod nga may probable cause agud maghatag ligwa sa formal audit investigation sa subject taxpayers kag agud mausisa sang revenue officers ang books of accounts kag iban pa nga accounting records sang amo nga taxpayers.
Ginpaathag sang BIR nga ang LOA amo ang ila legal nga instrumento agud nga suguran ang formal tax audits sa bisan sin-o nga taxpayer. Ginklaro sini nga indi ini “conclusion of liability”.
“Accountability begins with the consistent application of the law. Where there is a basis to investigate, the BIR will do so. And if evidence of tax violations exists, it is our duty to pursue the appropriate civil, administrative, or criminal remedies,” suno sa BIR.
Ang mga negosyo nga subject sa audit amo ang mga masunod:
Carpio Lawyers (Formerly Carpio & Duterte Lawyers)
Zelta Matiem Salon
City Hall King Chow Foods Corporation
Davao Bounty Times Foods Corporation
Madayaw Fisheries Inc.
Davao Emerging Taipans Corporation
Amianan Shores, Inc.
Cale88 Foods Corporation
Geometry Security and Investigation Agency, Inc.
Suno pa sa BIR, ginbase ang ila desisyon nga mag-isyu sang mga LOA kasunod sang third-party information lakip na ang impormasyon halin sa publicly available and official sources nga otorisado sa idalom sang Section 5 sang National Internal Revenue Code.
Ginbasehan man sang BIR ang testimoniya sang Ombudsman kaangot sa statements of assets, liabilities, and net worth (SALN) ni Duterte amo man ang reports halin sa Anti-Money Laundering Council nga ginpangbuyagyag kadungan sang House impeachment proceedings sang Myerkules.
“This will be a rules-based approach in determining the truth. Rights will be accorded to the audited entities. This will be fully compliant with all Run After Tax Evaders protocols, the primary enforcement program of the Bureau for tax evasion and tax fraud,” dugang pa sa statement sang BIR.#
