Gin-anunsyo sang White House nga “terminated” ukon tapos na ang giyera sa Iran bangud sa ceasefire nga nagakatabo subong suno sa administrasyon ni US President Donald Trump.
Nag-umpisa ini nga ceasefire sa una nga bahin sang Abril.
Isa ini ka interpretasyon nga naghatag sa White House sang kahigayunan nga indi na kinahanglan mangayo pa sang pag-apruba halin sa Kongreso.
Ini nga pahayag nagapadayon sa tunga sang argumento ni Defense Secretary Pete Hegseth sa iya pagtestigo sa Senado sang Huwebes, kun sa diin nagsiling ini nga epektibo nga ginpauntat sang ceasefire ang giyera nga nagakatabo sa mga pungsod.
Apang wala pa ginakabig sang administrasyon nga kinahanglan nila sundon ang ginapatuman sang isa ka layi sang 1973 nga naga-require sang pormal nga pag-apruba halin sa Kongreso para sa mga tikang sang militar nga magalapaw sa 60 ka adlaw.
Apisar pa ginpalawig ang ceasefire, padayon sa gihapon nga ginakontrol sang Iran ang Strait of Hormuz, samtang ginapadayon sang U.S. Navy ang blockade ukon pagpanglambat agud pugngan ang pagguwa sa kadagatan sang mga oil tanker sang Iran.
