Ginpresenta sa publiko sang National Bureau of Investigation ang lima nila ka nadakpan nga gina-alegar nga nangilkil kay anay former House of Representatives Speaker Martin Romualdez.
Sa ginhiwat nga press conference, positibo nga ginreport ni Melvin Matibag ang madinalag-on nga pagkadakop sa mga suspek.
Upod sa mga nadakpan amo ang online media personality nga si Franco Mabanta.
Base sa impormasyon, ang Organized and Transnational Crime Division sang ahensya ang nanguna sa ginpatigayon nga entrapment operation nga nagresulta sa pagkadakop kay Mabanta.
Suno kay Director Matibag, posible nga magapangatubang sila sang kaso nga robbery ukon extortion nga may kaangtanan sa paglapas sang Cybercrime Prevention Act of 2012.
Sa imbestigasyon, gina-alegar nga ginpahog pa ni Mabanta si Romualdez paagi sa isa ka intermediary nga ipaguwa sini ang isa ka video nga maga-angot sa iya sa korapsyon batok sa opisyal.
Samtang, gina-alegar man nga nagpangayo ini sang kantidad nga 300 milyon pesos bilang baylo nga indi pagpaguwaon ang video, nga mahimo sini bayran sa apat ka beses sa tig-75 milyon pesos.
Bangod sa reklamo nga nabaton, nagpatigayon sang entrapment operation ang ahensya matapos ma-set up ang delivery sang una nga bayad, kag didto gin-aresto si Mabanta kag ang iban pa.
Apang, ginpanginwala sang nadakpan nga media personality ang mga alegasyon kag ginpahayag nga inosente ang mga ini.
Sa pihak sini, ginpaathag ni Director Matibag nga ang ila pagdakop indi pag-atake sa press freedom.
Dugang pa sang direktor nga padayon pa ang ila imbestigasyon agud mahibaluan ang iban pa nga anggulo sang ginapatihan ilegal nga buluhaton.
