Ginahandaan sang Western Visayas nga mapabilin ukon mapataas pa ang ranggo sini sa 2026 Palarong Pambansa sa Agusan del Sur nga patigayunon na subong nga bulan.
Nagapangatlo ang Region VI sang nagligad nga tuig nga may 44 gold medals, 54 silver medals, kag 58 bronze medals.
Sa interview sang Bombo Radyo kay Mr. Hernani Escullar, Jr., spokesperson sang Department of Education-Western Visayas, iya ginpahayag nga magapadala ang rehiyon sang masobra 1,200 ka delegates para sa 2026.
Sa sini nga numero, 630 ang mga atleta nga magapasakop sa nagkalain-lain nga sports disciplines samtang 20 naman ang maga-intra sa demonstration sports.
Suno kay Escullar, bilang kabahin sang preparasyon, mismo si DepEd Regional Director-Western Visayas Cristito Eco kag ang mga myembro sang management committee ang nagkadto sa Agusan del Sur sang katapusan nga semana sang Marso kag temprano nga bahin sang Abril.
Gin-check nila ang billeting school, ang kalayuon sini sa venue sang mga hinampang, ang pagbyahe sang mga atleta halin sa Iloilo pakadto sa Agusan, kag ang iban pa nga kinahanglanon.
Isa sa mga pagpanghangkat nga atubangon sang Western Visayas amo nga indi na sini makaupod ang Negros Occidental sa labing-una nga tion sa Palarong Pambansa bangud maga-compete na ini sa idalom sang Negros Island Region.
Natalana nga magbiya sa Iloilo ang delegasyon sang Western Visayas sa Mayo 15 kag magaabot sa Agusan sa Mayo 17 ukon 18.
Balantayan naman ang opening ceremony sa Mayo 24.
