Dal-on sa Netherlands ang 24 sa 38 ka mga Filipino crew members nga sakay sang MV Hondius matapos ang natabo nga hantavirus outbreak sa amo nga cruise ship.
Suno sa Department of Migrant Workers (DMW), lunsay hotel stewards ang 24 nga crew members nga natalana nga i-repatriate.
Kun makaabot na sa Netherlands, magapaidalom sila sa quarantine period nga magalawig sang tubtub anum ka semana.
Sa pihak nga bahin, magapabilin anay sa barko ang 14 pa ka mga Pilipino nga lunsay deck and engine staff. Magabyahe ang amo nga barko pakadto sa Rotterdam, Netherlands halin sa Tenerife, Spain kun sa diin ini naka-angkorahe subong.
Pag-abot sa Rotterdam, ipaidalom man sila sa quarantine sa sulod sang anum ka semana.
Suno kay DMW Sec. Hans Cacdac, kun makumpleto na ang quarantine period, papaulion na ang 38 Filipino crew sa Pilipinas.
Ginpaathag naman ni Department of Health (DOH) Sec. Teodoro Herbosa nga kinahanglan nga mag-agi ang crew members sa quarantine bangud ang incubation period para sa hantavirus ang mahimo maglawig sang 45 ka adlaw halin sang tyempo nga may contact sa infection.
Indi naman kinahanglan suno sa DOH nga ipaidalom pa sa test ang mga crew members kun diri na sila sa Pilipinas.
Ginpasalig man sang tiglikom nga indi mag-resulta ang hantavirus sa pandemic kaangay sang Covid-19 bangud indi man ini kaangay kadasig maglapta.
Nahibaluan nga ang hantavirus amo ang isa ka grupo sang virus nga ginadala sang mga ilaga kag iban pa nga rodents kag mahimo magresulta sang tuman nga sakit sa tawo. Mahimo ini makuha paagi sa pagdapat ukon contact sa infected nga ilaga, ila nga ihi, higko, ukon laway.
Ang strain sang hantavirus nga nakita sa Dutch-flagged cruise ship amo ang Andes virus.
Makita ini sa Latin America kag amo lamang nga hantavirus nga kilala nga mahimo nga mapasa halin sa isa ka tawo pakadto sa iban pa nga tawo ukon limited human-to-human transmission.
Sa nagligad nga mga outbreak, ang paglapta halin sa tawo pakadto sa tawo may koneksyon sa malawig kag malapit nga kontak sa sulod sang panimalay, intimate partners, kag healthcare workers.#
