Ginpataas sa full alert status ang Philippine National Police (PNP) kagab-i matapos ang tension kag sunod-sunod nga lupok sang pusil sa Senado.
Suno sa PNP, ang tikang ang kabahin sang standard security protocol kag para masiguro ang safety sang publiko samtang padayon ang imbestigasyon sa insidente.
Ginpatuman ang alert status pasado alas-8:00 kagab-i nga nagresulta man sa pagkansela sang leave kag dugang nga deployment sang mga pulis sa palibot sang Senado.
Yara sa 1,500 pulis ang nauna nga gindeploy sa lugar para magbantay.
Padayon nga naka-deploy ang mga otoridad samtang ginaimbestigaran pa ang ginhalinan sang mga serye sang lupok sang pusil kag ang aktuwal nga hitabo sa sulod sang building.
