Nagdeklara sang outbreak sang Ebola ang Democratic Republic of the Congo sa Africa.
Sa pinakaulihi nga datos, naglab-ot na sa 246 ang kaso sang nasambit nga sakit sa amo nga pungsod kag nagdangat na sa 65 ka tawo ang napatay.
Suno sa Africa Centres for Disease Control and Prevention, kadam-an sa mga napatay halin sa mga banwa sang Mongwalu kag Rwampara sa Ituri province nga kilala bilang gold-mining areas.
Nagpatawag naman sang meeting ang mga otoridad upod sa mga kaiping sini nga pungsod kaangay sang Uganda kag South Sudan pati na ang mga international partners agud pabaskugon ang mga tikang batok sa paglapta sang sakit.
Lakip sa ila iga-prayoridad amo ang response efforts kag pagpatuman sang cross-border surveillance.
Nahibaluan nga una nga nadiskubrehan ang Ebola sang tuig 1976 sa Democratic Republic of the Congo kag ginapatihan nga naghalin ang amo nga sakit sa mga paniki.
Ini na ang ika-17 nga outbreak sang amo nga delikado kag makamatay nga balatian sa nasambit nga pungsod.
