Gin-revoke sang Estados Unidos ang diplomatic visa kag tourist visa ni anay House Speaker kag subong Leyte Representative Martin Romualdez.
Ginkumpirma ini ni Philippine Ambassador to Washington Jose Manuel ‘Babes’ Romualdez apang wala pa ini sang kumpleto nga detalye nga nahatag.
Si Ambassador Romualdez amo ang pakaisa ni Representative Romualdez. Pareho man sila nga mga pakaisa ni Presidente Ferdinand Marcos Jr. paagi sa iloy sini nga si anay First Lady Imelda Marcos.
Sa pihak nga bahin, wala naman naghatag sang public statement ang embahada sang Estados Unidos diri sa Pilipinas sa gin-report nga visa revocation bangud sa idalom sang polisa, ang US authorities ang wala nagasapubliko sang individual visa records.
Si Romualdez amo ang isa anay sa pinakamalapit nga kaalyado ni President Marcos kag masami kaupod sini sa mga opisyal nga biyahe sa guwa sang pungsod.
Nagaatubang siya subong sang mga reklamo sa Ombudsman bangud sang ginaalegar nga plunder, graft, money laundering, kag bribery.
Sa subong, wala pa ma-indict sa korte si Romualdez bangud ang reklamo sang Ombudsman batok sa iya ang yara pa lamang sa preliminary investigation.
Naghingyo anay si Romualdez sa Sandiganbayan nga bawion ang gindagdag sa iya nga precautionary hold departure order (PHDO) nga amo ang nagalabag sa iya nga makabyahe sa luwas sang pungsod.
Ginbasura sang korte ang iya nga hingyo.
Una na nga gin-akusaran ni Ombudsman Jesus Crispin “Boying” Remulla si Romualdez nga amo ang “purported mastermind” sang corruption scheme nga naangot sa ghost flood control projects.
Ginpanginwala sang kongresista ang tanan nga akusasyon sa iya kag nagpaandam man nga indi siya magsugot nga himuon siya nga “scapegoat” ukon “fall guy.”
