Ginapanindugan ni Senator Loren Legarda nga siya gihapon ang Senate President Pro Tempore kag indi si Senator Sherwin Gatchalian.
Suno sa senadora, 13 ka boto ang kinahanglan agud mapili ang Senate President Pro Tempore, Senate Secretary, Sergeant-at-Arms kag iban pa nga mga opisyal sang Senado nga sandig suno sa iya sa 1987 Constitution kag mga pagsulundan sang Senado.
Suno kay Legarda, lain ang numero sang mga senador nga kinahanglan para sa quorum kag lain man ang numero nga kinahanglan para sa pagpili sang mga opisyal sang upper chamber.
“Sa kabila ng aking paggalang sa aking mga kasamahan, labag sa Konstitusyon at alituntunin ng Senado ang nangyaring pagtatalaga ng Senate President Pro Tempore, Senate Secretary at Sergeant-at-Arms dahil labindalawang senador lamang ang nasa plenaryo na bumoto,” suno kay Legarda.
Ginpamilit man niya nga indi mahimo nga gamiton bilang shortcut ang kaso nga Avelino vs. Cuenco agud mapanubo ang numero sang mga senador nga kinahanglan para sa quorum kag sa reorganisasyon sang chamber.
“Ang Konstitusyon ang gabay ng ating demokrasya. Ito ang dapat nating ipaglaban para sa Senado, para sa ating mga institusyon, at higit sa lahat, para sa bawat Pilipino. Si Loren Legarda po, ang inyong Senate President Pro Tempore,” dugang sini sa video message nga iya gin-post sa Facebook.
Matandaan nga sang nag-abot si Sen. Francis “Chiz” Escudero sa plenary hall sang Myerkules, Hunyo 3, ginbawi nanday former Senate President Vicente “Tito” Sotto III ang nagapanguna nga leadership posts, gin-reorganize ang chamber, kag temporaryo nga gintapos ang pagka-paralisa sang Senado matapos nga wala nagsipot ang grupo nanday Sen. Alan Cayetano sa tatlo ka sunod-sunod nga session days.
Sang amo nga tion, gin-eleher si Gatchalian bilang Senate president pro tempore kag gin-designate man nga acting Senate president samtang si Sen. Juan Miguel “Migz” Zubiri naman ang gin-eleher nga majority leader.#
