Nagkampyon ang Filipina tennis star nga si Alex Eala sa 2026 Birmingham Open sa Great Britain matapos ginlutos sa final match si Nikola Bartunkova sang Czech Republic.
Naglab-ot sa three sets ang ila away kag nagtakop sa scores nga 5-7, 6-3, 7-5.
Ini na ang ikaduha nga Women’s Tennis Association (WTA) singles title ni Eala matapos nagpangibabaw man sa WTA 125 Guadalajara Open sa Mexico sang 2025.
Antes sini nga kadalag-an, 13 ka beses nga nalutos si Eala sa kamot sang Czech players.
Suno sa Pinay tennis player, ang tropeo nga iya nabaton wala nagakahulugan nga isa na siya sa pinakamaayo nga player. Gani suno sa iya, mas nahatagan pa gid siya sang inspirasyon nga mas mangin mapisan pa gid sa training.
Sa pag-award sa iya sang trophy, ginbasa sa Pinay player ang pangalan sang Birmingham champions nga nagalakip kanday Billie Jean King, Maria Sharapova, kag Ash Barty.
“It sounds really beautiful, of course. All those names that you’ve mentioned are tennis greats, and I’m so honored to be lifting this trophy today,” sabat ni Eala. “But lifting this trophy does not mean that I will be among the greats yet, so I’m motivated to keep working, and I’m grateful for the part that this trophy has played in my journey.”
Sunod nga magahanas si Eala para sa Queen’s Club Championships kun sa diin maatubang sini ang isa ka qualifier sa main draw.#
