Ginkumpirma sang Ateneo de Manila University ang kamatayon sang duha sa ila nga student-athletes nga nalumos kadungan sang team-building activity sa Dipaculao, Aurora subong nga adlaw, Hunyo 8.
Ang mga nagtaliwan amo sanday Rene Clert Baterbonia, 19, kag Divine Adili, 21-anyos.
Sa official statement sang unibersidad, ginpalab-ot sini ang kasubo kag pagpakig-simpatiya sa mga pamilya, kaabyanan, teammates, coaches, kag pinalangga sang duha ka student-athletes.
Ginhingyo man sang Ateneo community ang pagpangamuyo kag suporta kasunod sang insidente.
“The entire Ateneo community mourns the loss of Rene and Divine. The University extends its heartfelt condolences to their families, friends, teammates, coaches, and loved ones. We ask the community to keep them in their prayers during this most difficult time,” suno sa Ateneo.
Si Baterbonia nga tumandok sang Agusan del Sur ang kilala sa pagdala sang pangalan sang Davao Region sa Palarong Pambansa.
Sa Ilocos Norte sang 2025, nagdaog sila sang gold medal sa basketball kag ang nasambit nga 6-foot-4 former Ateneo de Davao star ang ginkilala nga MVP.
Sini lang nga 2026, nanguna siya liwat sa Davao Region sa gold medal match, apang nagkabos sila nga madepensahan ang titulo matapos ginlutos sang CALABARZON.
Natabo ang drowning incident halos isa ka semana lang halin sang nag-abot si Baterbonia sa Manila sang Huwebes, Hunyo 4, para nga magsaylo na sa Ateneo campus sa Katipunan, Quezon City. Ginalauman kuntani nga maga-debut siya para sa Blue Eagles sa Season 89 sang UAAP subong nga tuig.
Sa pihak nga bahin, si Adili naman ang isa ka 6-foot-10 Nigerian foreign student-athlete nga nag-upod sa hampang sang Ateneo sang Season 88 kag nakabulig sa Blue Eagles nga magtapos bilang ikaanum nga may 6-8 record.
“The University is providing support to the families of Rene and Divine, as well as to their teammates and members of the Ateneo community affected by this tragedy,” kabahin sang statement sang unibersidad. “We respectfully ask for privacy and space for all those grieving as they come to terms with this profound loss.”#
