Padayon pa ang pagpangita sa isa ka 21-anyos nga lalaki nga gin-report nga nalumos sa kadagatan nga sakop sang Barangay San Enrique, San Lorenzo, Guimaras kadungan sang malain nga tyempo.
Suno sa report sang San Lorenzo Municipal Police Station, residente man sang amo nga barangay ang biktima.
Sandig sa imbestigasyon, ala una kaina sang hapon, nagpanahid ang biktima kaupod ang duha ka iban pa nga lalaki nga naga-edad sang 28-anyos kag 22-anyos.
Samtang ginakay-o nila ang ila nga fishing net ginabanta 200 metros ang kalayuon halin sa baybayon, ginapahayag nga didto na kag natabo ang insidente.
Gintuyo pa sang duha sini ka kaupdanan nga luwason ini apang bangud sa mabaskog nga hampak sang balod, wala nila ini naabtan.
Nagpangayo sila gilayon sang bulig halin sa barangay officials nga nag-request man sang dugang nga assistance halin sa Municipal Rescue Unit kag iban pa nga responding agencies.
Suno sa pulis, indi maayo makalangoy ang amo nga lalaki.
“Further investigation revealed that the victim was not a good swimmer and that he usually relied on his companions whenever he went fishing. It was also established that, at the time of the incident, the water level was receding as the tide was approaching low tide,” suno sa report sang pulis.
Nahibaluan nga apektado man ang Guimaras sang Habagat ukon Southwest Monsoon nga ginpabaskog pa sang Bagyo Kiyapo.
