Nagaguwa sa inisyal nga imbestigasyon sang Police Regional Office 3 nga nagalangoy ang duha ka student-athletes sang Ateneo de Manila University sa Dipaculao, Aurora apang wala nila nasarangan ang mabaskog nga bakod nga nagdala sa ila sa mas madalom nga porsyon sang dagat.
Kabahin ini sang statement nga gin-release sang pulis matapos ginkumpirma sang Ateneo ang kamatayon nanday Divine Adili kag Rene Clert Baterbonia kadungan sang ila nga team-building activity.
“Initial findings indicate that the victims were swimming when they were reportedly carried by a strong current into deeper waters,” suno sa PRO 3.
Gin-athag sini nga padayunon pa nila ang tul-id nga imbestigasyon sa insidente.
Ginpangabay sa publiko nga likawan ang mga espekulasyon kag tugutan ang awtoridad nga kumpletuhon ang ila pagpangusisa.
Sa separado nga pahayag sang Aurora Provincial Police Office, ginpalab-ot sini ang pagpakig-unong sa pamilya, mga abyan, teammates kag mga pinalangga sang student-athletes.
Kagab-i sang gin-anunsyo sang Ateneo ang pagtaliwan nanday Baterbonia, 19, kag Adili, 21.
Sa official statement sang unibersidad, ginpalab-ot sini ang kasubo kag pagpakig-simpatiya sa mga pamilya, kaabyanan, teammates, coaches, kag pinalangga sang duha ka student-athletes.
Ginhingyo man sang Ateneo community ang pagpangamuyo kag suporta kasunod sang insidente.
Si Baterbonia nga tumandok sang Agusan del Sur ang kilala sa pagdala sang pangalan sang Davao Region sa Palarong Pambansa.
Sa Ilocos Norte sang 2025, nagdaog sila sang gold medal sa basketball kag ang nasambit nga 6-foot-4 former Ateneo de Davao star ang ginkilala nga MVP.
Sini lang nga 2026, nanguna siya liwat sa Davao Region sa gold medal match, apang nagkabos sila nga madepensahan ang titulo matapos ginlutos sang CALABARZON.
Huwebes sang nag-abot si Rene sa Manila para nga magsaylo na sa Ateneo campus sa Katipunan, Quezon City. Ginalauman kuntani nga maga-debut siya para sa Blue Eagles sa Season 89 sang UAAP subong nga tuig.
Sa pihak nga bahin, si Adili naman ang isa ka 6-foot-10 Nigerian foreign student-athlete nga nag-upod sa hampang sang Ateneo sang Season 88 kag nakabulig sa Blue Eagles nga magtapos bilang ikaanum nga may 6-8 record.#
