Nagbyahe na si President Ferdinand Marcos Jr. pakadto sa Kazan, Russia agud nga magpasakop sa commemorative summit sa tunga sang Association of Southeast Asian Nations (ASEAN) kag Russia.
Naghalin sanday Marcos kag ang iya delegasyon 11:55 kagab-i, Hunyo 16.
Ginalauman nga madiskusyunan sang mga lider ang kooperasyon sa tunga sang Moscow kag ASEAN sa security, trade, energy, food security, kag iban pa nga key areas.
Antes naghalin, nagbilin si President Marcos sang mensahe nga kun ano ang ila istoryahan ni Russian President Vladimir Putin sa bilateral meeting sa sidelines sang summit.
Sa iya departure statement, ginpahayag sini nga dala sa iya nga byahe ang regional kag personal significance bangud ini man ang iya una nga pagtapak sa Russia.
Matabo ang iya una nga pagbisita 50-anyos matapos ang maragtason man nga pagkadto sang iya amay nga si anay President Marcos Sr. sa former Soviet Union sang 1976 nga amo ang nagresulta sa establishment sang diplomatic relations sa tunga sang Manila kag Moscow.
“As Chair of ASEAN, the Philippines is committed to ensuring that this Commemorative Summit produces substantive and forward-looking outcomes that deepen ASEAN’s Strategic Partnership with Russia and contribute, in concrete terms, to regional peace, stability, and shared prosperity,” suno kay Marcos.
Dugang sang president: “This year, the Philippines and Russia commemorate 50 years of diplomatic relations. For over five decades, our bilateral ties have steadily deepened across trade, education, culture, agriculture, energy, science, and, above all, through the sustained bonds between our peoples. We look forward to building on these foundations and opening new avenues of cooperation for the future.”
Ang paghalin sang president ang kadungan man sang special session nga iya ginpatawag sa Kongreso subong nga aga.#
