Inoras ang ginlawig antes nga nadakpan subong nga aga, Hunyo 20, ang suspek nga nagluthang-patay sa iya kasilingan sa Barangay Airport, Mandurriao, Iloilo City.
Ang arestado amo ang 50-anyos nga lalaki nga naga-trabaho bilang construction worker samtang ang biktima naman amo ang 57-anyos nga electrician.
Suno kay Police Captain Lester Oliveros, hepe sang Iloilo City Police Station 10, wala gid nagkooperar ang suspek apisar nga halin 11:00 pa kagab-i ang negosasyon sa iya nga magsungka ini.
Pahayag sang hepe, nagabato ang amo nga suspek kag nagapalupok sang iya nga armas.
Naghambal pa ini sa pulis nga alas syete siya subong nga aga magasungka.
Suno kay Oliveros, ginhimo man nila ang tanan nga makig-negosyar sa matawhay nga paagi, apang wala sang kooperasyon ang suspek kag una ini nga nagpalupok sa Special Weapons And Tactics (SWAT) sang ginsulod na ang iya balay.
Bangud sini, natiruhan man ini sang SWAT rason nga nasamaran ang suspek kag gindala sa ospital.
Indi pa makumpirma kun pila ang igu sang suspek as of press time.
Nahibaluan nga sandig sa imbestigasyon, daan kag madugay na nga hiligut-anon ang rason sang pagtiro sang suspek sa iya kasilingan kagab-i.
