Ginmanduan na ni Mayor Raisa Treñas ang Schools Division of Iloilo City sa bulig man sang Iloilo City Police Office kag iban pa nga concerned offices nga pabaskugon kag doblehon pa ang seguridad sa tanan nga buluthuan sa syudad sang Iloilo.
Sa interview sang Bombo Radyo kay Joy Fantilaga-Gorzal, Spokesperson ni Mayor Raisa Treñas, iya ginpahayag nga ginakasubo sang City Government ang natabo nga shooting incident sa San Jose National High School sa Tacloban City kun sa diin tatlo ka mga estudyante ang nadulaan sang kabuhi.
Suno pa kay Gorzal apisar wala ini natabo sa Iloilo City makabig ini nga isa ka wake up call sa tanan.
Pahayag pa sini kinahanglan nga padayon nga pasangkaron ang seguridad sa mga eskwelahan kag siguruhon nga ang mga estudyante makatuon sa isa ka lugar nga luwas kag wala sang dapat kahangaw-an sa ila nga palibot.
Dugang pa ni Gorzal, gilayon naman nga nakigkita ang Iloilo City Police Office sa Schools Divison Superintendent agud mapabaskog pa ang seguridad sa mga eskwelahan amo man ang ila kampanya sa anti-bullying programs kag early intervention efforts.
