Human error ang ginatudlo nga panguna nga rason sa duha ka separado nga aksidente nga nagluntad sa sulod sang isa ka adlaw sa distrito sang Jaro, Iloilo City kahapon, Hulyo 16.
Sa interview sang Bombo Radyo kay Retired Police Colonel Uldarico Garbanzos, hepe sang Iloilo City Traffic and Transportation Management Office (ICTTMO), nakabunggo ang isa ka Montero Sport sa apat ka concrete barriers sa Barangay Tagbak, Jaro pasado las-4:00 sang kaagahon.
Base sa inisyal nga pag-usisa, posible nga nakaapekto ang pag-inom sang makahulubog nga ilimnon kag paglapas sa speed limit ukon pagkomiter sang overspeeding rason nga nadulaan sang kontrol ang driver sa salakyan.
Sa separado naman nga insidente sang las-3:50 sang hapon sa Barangay Quintin Salas, Jaro, nasalakay sang isa ka truck ang apat man ka concrete barriers antes naulamid ang isa ka pick-up.
Ginpahayag ni Garbanzos nga mahimo nga wala mabantayan sang driver ang iya pagpadalagan kag nagkulang sa pag-antisipar sa sitwasyon sa dalan, amo nga wala na niya malikawan ang makabunggo sa barrier.
Ginpabutyag man ni Garbanzos nga pareho nga insidente nagapakita sang kakulangan sa pagtuon sang sitwasyon sa dalan kag pag-obserbar sa mga traffic control devices, nga nagahalin sa human error kag indi sa problema sang imprastraktura ukon dalan.
Dugang pa sini, ang pagmaneho isa ka responsibilidad nga nagakinahanglan sang disiplina, pag-obserbar kag pagsunod sa mga polisa sa trapiko agud malikawan ang mga aksidente sa dalan.
Bangud sini, nagahanda ang ICTTMO sang dugang nga mga safety measures lakip ang pagbutang sang reflective delineators, mas madamo nga traffic signages kag dugang nga concrete separators sa mga apektado nga lugar.
Suno sa iya, dako ini nga bulig agud mas makita sang mga motorista ang mga traffic barriers ilabi na sa tion sang gab-i ukon kon sa diin poor visibility ang dalanon.
Dugang pa, nag-request na ang ICTTMO sang dugang nga traffic enforcers para sa Barangay Tagbak kag Barangay Quintin Salas, nga kabahin sang Traffic Choke Area Development Program.
Ginapaabot nga sa masunod nga mga bulan, himuon ini nga mga traffic discipline zones agud mapabaskog ang implementasyon sang mga polisa sa trapiko kag mapanubuan ang mga insidente nahanungod sa reckless driving sa lugar.
By: Bombo Cyrene Nasis
