Nagasaka ang kahangawa sang pagtaas sang kaso nga naangot sa tuman nga init sa Japan samtang amat-amat pa lang nga nagabangon sa halit nga gintuga sang mabaskog nga linog.
Suno kay Bombo Josel Palma, international correspondent sa Japan, may mga lugar nga gin-igu sang linog nga subong yara sa 36 degrees Celsius ang temperatura.
Bangud sang init, mas nagbudlay ang rescue kag recovery operation.
Sa pinakaulihi nga datos, nagsaka na sa 36 ang numero sang napatay sa magnitude 6.8 nga linog nga nagtay-og sa isla sang Kyushu sang Martes.
Padayon nga nagapangita sang posible pa nga mga survivor ang mga rescuer bisan pa sa nagapadayon nga mga aftershocks.
Bangud madamo ang nagkalaguba nga balay kag na-utod ang suplay sang kuryente, nagapabilin sa evacuation center ukon nagakatulog sa sulod sang ila mga salakyan ang linibo ka mga survivor.
Nahibaluan nga suno sa Kumamoto Prefecture, nagsaka na sa 34 ang numero sang napatay, 96 ang mga nasamaran kun sa diin anum sa ila ang ginakabig nga kritikal.
Base sa inisyal nga assessment sang mga opisyal, masobra 1,500 ka mga establisemento ang naguba sa amo nga linog.#
