Wala pa sa direksyon sang administrasyon ni President Ferdinand Marcos Jr. ang pagpataas sang plete sa pampubliko nga transportasyon bisan pa sa bag-o nga pagsaka sang presyo sang gatong.
Suno kay Palace Press Officer Claire Castro, luyag sang Department of Transportation ukon DOTr nga mangin katapusan gid nga tikang ang fare hike samtang ginapadayon sang gobyerno ang mga subsidya kag iban pa nga tikang agod mabuhinan ang epekto sang mataas nga presyo sang krudo sa mga driver kag commuter.
Lakip sa mga ginapadayon nga tikang sang DOTr ang fuel discount kag libre nga toll para sa mga bus.
Ginatun-an man ang targeted subsidies para sa mga transport group paagi sa AICS program sang Department of Social Welfare and Development.
“Sana po ‘yun ang magiging last resort. ‘Yun ang panalangin,” suno kay Castro.
“Hindi po kasi sa ngayon inclined talaga na magtaas ng pamasahe para sa ating mga kababayan, pero hindi po naman sinasara ang pintuan patungkol po dito,” dugang sini.
Sandig kay Transportation Secretary Giovanni Lopez, ginapadayon sang Land Transportation Franchising and Regulatory Board ang hearings sa mga petisyon para sa fare increase, samtang ginatun-an man kon paano mapasangkad ang fuel discount program sa iban pa nga klase sang pampubliko nga transportasyon.
Sa subong, siling ni Castro, apisar indi pa pagpasakaan ang pamasahe, apang wala man sini ginasira ang posibilidad nga ini ipatuman kon kinahanglanon.#
